مقدمه في اعدادي هندسه

فى البدايه احب اهنى كل اللى داخل هندسه الدلتا واحب اقول حاجه مهمه جدا ان الكليه مختلفه 180 درجه عن
الثانوى لان الثانوى كان فى مدرس بيقولك ذاكر كذا وكذا
الكليه ما فيش الكلام ده خالص
يعنى انت اللى بتمشى حياتك على مزاجك فياريت تكون قد المسئوليه وتاخدها جد وتذاكر من اول يوم علشان ترتاح وصدقنى لو حضرت المحاضرات والسكاشن
وروحت ذاكرت ساعتين بالكتير بس اول باول هتجيب امتياز مش جيد جدا
يا ريت ما حدش يستهتر بالكلام ده ويستغل الحريه غلط ويبقى الاسم انه بيروح الكليه لكنه لا بيحضر ولا بيذاكر

نظام الدراسة والحياة هتبقى ازاى فى الكلية
بصوا بقى الدفعة بتتقسم تقسيمة كبيرة وتقسيمة صغيرة
التقسيمة الكبيرة انها بتتقسم نصين النصين بيدرسوا نفس المواد ونفس المعيدين والدكاتره بس كل مجموعه ليها جدول لوحدهايعنى مثلا المجموعه الاولى هتاخد محاضرة ميكانيكا يوم السبت والمجموعه التانيه هتاخد نفس المحاضره من نفس الدكتور يوم الاربعاء مثلا وهكذا فى كل المواد طبعا الموضوع ده بيعمل مشاكل فى الاول لان ناس كتير بتبقى عايزه تحضر مع زمايلها فى المجموعه التانيه وتيجى تكلمه يقول احنا ما يفرقناش عن بعض غير الموت
هههههههههههههههههه
طبعا الموضوع ده غلط تماما لان الجدول بيبقى يا دوب متظبط يعنى مثلا لو حضرت فى مجموعه غير مجموعتك ممكن يفوتك سكشن وهكذا والموضوع ده بيستفز الدكاتره اوى فى اول السنه وتلاقيهم بياخدوا غياب اول السنه فى المحاضره علشان الطلبه تخاف وترجع مجموعتهم
والتقسيمة الصغيرة ان الدفعة بتتقسم سكاشن
يعنى مثلا كانت دفعتنا تقريبا 20 سكشن واول اسبوع دة بيبقى توهان شوية
بس كل حاجة بتتظبط ان شاء الله
لما تظبطوا المحاضرات والسكاشن بتاعتكوا

بالنسبة للمواد اللى هتدرسوها ان شاء الله
فى طبعا مواد سهلة ومواد صعبة
بس كلوا محتاج مذاكرة اول بأول
وكل حاجة هتبقى فى التمام
بص بقى ان شاء الله هيبقى عندك
- الرياضة الترم الاول جبر وتفاضل
الترم التانى هندسة تحليلية وفراغية وتكامل
-الفيزياء الترم الاول خواص مادة وكهربية
الترم التانى حرارية ومغناطيسية
-الميكانيكا الترم الاول استاتيكا
الترم التانى ديناميكا
-الرسم الهندسى شغااااااااااااال ينيفرسال الترمين
-الكومبيوتر ترم اول بس
- الكيمياء ترم تاني واللغة الفنية ترم تانى
-هندسة الانتاج والانسانيات ترم تانى
تاريخ علوم هندسيه ترم تانى

نتكلم شويه عن الدكاتره
بالنسبه للدكاتره عندنا فى هندسه الدلتا طيبين جدا ما بيحبوش يأذوا حد بس طبعا فى طلبه مستفذه بتخلى الدكتور يخرج عن شعوره ويبقى نفسه يسقط الطالب بس زى ما قلت لكم الدكاتره عندنا طيبين ولو اعتذرت بعد المحاضره الموضوع كله هيخلص
بالنسبه لكل ماده ودكاترتها

الفيزيقا الهندسيه زى ما بيسموها فى الكليه
هتلاقى بتديها الدكتوره سميه بتدى فى التيرم الاول كهربيه والترم التانى مغناطيسيه دكتوره سميه طيبه جدا بس ذاكر معاها اول باول لان الجزء بتاعها كبير اوى وبتدى كل محاضرةجزء كبير علشان يا دوب تلحق تخلص على اخر التيرم الجزء بتاعها
ملحوظه:لازم تحضر محاضرات دكتوره سميه لانها بتدى مسائل مش موجوده فى الكتاب وبتجبها فى الامتحان وكمان فى حاجات بتتشرح فى السكاشن بتيجى فى الامتحان والدكتوره مش بتشرحها فى المحاضرات فالسكاشن برضه مهمه


الكمبيوتر

الكمبيوتر ماده بسيطه فى جزء منها كبير نظرى وبيديها دكتور اشرف زين الدين
هو بيضع بعض القواعد فى اول السنه تلتزم بيها هتحبه هتخالفها استحمل اللى هيجرالك زى مثلا انه ما بيجبرش حد على الحضور لانه مش بياخد غياب لو زهقت من المحاضرة وعايز تمشي مش لازم تستاذن اتفضل على طول بس يا ويلك لو مثلا اتكلمت مع اللى جنبك وشافك
لو الدكتور حب يعمل امتحان فى المحاضرة وياخد غياب بيقول فى غياب وامتحان المرة الجايه نبهوا على زمايلكم
بالذمه فى احترام كده

الرياضه

من اهم المواد لانها مستمرة ترمين وهتلم منها درجات فى جزء الجبر ف التيرم الاول وهندسه تحليليه فى التيرم التانى بيديه دكتور ايهاب مصطفى وهو دكتور طيب جدا محاضرته مش طويله امتحانته سهله ويقعد يشرح طول المحاضرة وفى النهايه اكتشف انه ادلنا جزء صغير

اخيرا وصلنا للرسم(الزغلول الكبير)
الرسم بلا مبالغه اهم ماده فى اعدادى نظرا لدرجاتها الكبيره
والاهم وانت رايح الكليه وراجع بادوات الرسم الناس تعرف انك دخلت هندسه وبقيت بشمهندس
هههههههههههههه
فى البدايه اعرف الادوات علشان ناس كتير هتقلك ادوات كتير الحمد لله الواحد درس وعرف المطلوب
اهم حاجه مسطرة حرف تى ومثلث تلتينى ستينى ما تستغربش يعنى فيه زاويه 30 وزاويه 60
طبعا قلم سنون انسي القلم الرصاص ده خالص
برجل عادى خالص هتلاقى بقى ناس جايبه برجل بتطويله وجايبه طقم مش عاف بكام اسمع الكلام هو البرجل العادى بس ومعاه سنون h
فوطه صفرا من بتاعت سواقين التاكسي علشان تنضف بيها اللوحه واستيكه نضيفه من ام خمسه جنيه دى بلاش بقى ام ربع جنيه دى انساها خالص
طبعا اللوح اكيد يعنى نصيحه اشترى كانسون هى غاليه شويه بس هتريحك على الاخر
ممنوعا منعا باتا استخدام المسطرة او المنقله
فى ناس رخمه هتقول طب نقيس ازاى يا عم عندك اى مثلث بيبقى مدرج زى المسطرة قيس بيه
لو حد من المعيدين شاف معاك مسطرة او منقله هياخدهم منك
نتكلم بقى عن الماده

اولا وقبل كل شئ لازم تكون حابب الماده ولو ما فهمتش حاجه اسال المعيدين هم بصراحه احسن معيدين فى الكليه بس ابقى رخم عليهم فى السؤال هيجاوبوك وابقى اسال اصحابك فى محاضرات هتبقى مش فاهم حاجه فى اى حاجه وكمان المفروض تعمل واجب اسال اى حد تعرفه وبعدين اعمل اللى تقدر عليه حتى لو هترسم رسمه من 100 رسمه صدقنى هيساعدك فى الفهم بعد كده وهتحس بعدها ان الموضوع سهل وهتحبه

بالنسبه للدكاتره
هتلاقى الدكتور حنفي شبانه بصراحه ما تلاقيش حد بيشرح زيه ولو حد مش فاهم وقاله بيغير طريقه الشرح تماما لحد ما يفهمه
بس التعامل معاه عامل زى القنبله اقل غلطه بموته عصبي جداااااااااااااااااااااااااااا يعنى عصبي من هنا لبكرة الصبح اقل حاجه تعصبه وتخليه يركبك الصاروخ
صاروخ ايه!!!!
هتفهم لما تتعامل معاه
اهلاوى متعصب نصيحه اى حد زملكاوى يا ريت ما يقلش قدام الدكتور انه زملكاوى
بس لما يبقى رايق وده نادر بيبقي من اللطف الشخصيات اللى ممكن تقابلها

الراجل ده عليه كلام كتير ملخص الكلام اسمع كلامه بالحرف وهتلاقى نفسك مش فاهم منه حاجه اعمل نفسك فاهم ومتنساش تسال اصحابك والمعيدين يعنى ما تبقاش بطيخه وتقول ما عنى ما فهمت
انسب طريقه للتعامل مع الدكتور حنفى المثل اللى بيقول
امشي زى ما بيقول الدكتور حنفى يحتار الدكتور حنفى فيك

نصيحه اخيره اهتم بحضور السكاشن واللوح اللى بترسمها جوة السكشن ولوح الواجب والا ابشرك مقدما انك شلت الماده

نتكلم شوية عن الامتحانات ( انا عارف تلاقيكوا بتقولوا وليه السيرة دى بس(
مفييييييييش اكتر من الامتحانات فى الكلية دى
من اول ما بندخل بنتظبط فى الامتحانات
يعنى خلال الدراسة بيكون فى دايما امتحانات مستمرة كل فترة كدة (كويز) فى السيكشن بتاعك
وبتبقى فى معظم المواد و حاولوا تستفيدوا منها عشان تلاقى نفسك مجمع درجات كتير
فى اعمال السنة فى الاخر

وبعد كدة يا حلو تلاقى الميدتيرم بيخبط تك تك تك
دة اللى هو امتحان نص الترم كدة


نصيحه اخيره ان الترم الاول اسهل كتيييييييير من التانى
يعنى نحاول نستفيد منه على قد ما نقدر ان شاء الله

معلش اذا كنت طولت عليكم بس ده لمصلحتكم

الــف شكــــر على النصائح الغاليه

الف شكر يا مان على الموضوع الجامد دة بس على فكرة انا بروح الكلية كل يوم ومافيش محاضرة او سكشن بتفوت منى بس انا مش عارف اذاكر اية ولا عارف اذاكر ازاى فياريت تفدنى انت فى الموضوع دة وانا مستنى ردك بس بليز ماتنفضش

اولا يا بشمهندس نادر اول ماترجع من الجامعه حاول تراجع اللي انت اخدته ولو حتى ساعتين

وبعدين افصل شويه وارجع شوف الحاجات اللي عليك في اليوم التاني اقراها بس

واتعب نفسك شويه في اللغه طول ما أنت قاعد في البيت امسك كتاب اللغه وترجم فيه

ولو حاجه وقفت عليك ادخل على النت هتلاقيها او اسأل فيها البشمهندسه سماح وان شاء الله تكون من الناجحين

تسلم ايدك يجميل .......................................... ومنتظرين المزيد